الأب افرايم الانبا بيشوى
بيقولوا عنى غريب عن
البلد، انا القريب
انا اللى فيها من
زمان، من الاف السنين
انا اللى دمى ارتوى بِه
التراب
وانا اللى عرقى فى ارض
بلادى داب
وانا اللى انظلمت من
ارض فارس والرومان
ومن اليونان ومن اللى
جو يفتحوا بلادى
ويقولوا ادخلوها
بامان ...
وانا اللى ما تركونى
احيا فى الامان .
انا اللى جار بى الزمان !
وانا اللى ادو خيرى
للثعالب واللى فضل
حامت حوله الطيور
الجارحه والسارحه
انا
احترقت زى اللبان ! وريحت حبى فاحت
فى المكان .
انا اللى ثرى بلادى من
عظام أجدادى
أتكون وتغذى وشجره شاب
.
جايين بقى يقولولى انت
غريب
ويقولوا هاجر ياود
ياشاطر لبلاد الثراب
والعم سام انت اصلك
زيهم
انا لو ههاجر يكون لى أرحم
بس هاكون هناك غريب
وانتو أهلى وليا فيكم
كام وكام أخ وحبيب
وانا اللى حبى لبلدى
مصرغريب،عجيب .
بيقولوا طب اقبل بحكم
الشرع وتبقى زى الضرع
نحلب منك اللبن وتكون
مننا محروس.
يا ناس انا ايه؟ انا
زيكم ! وهو انتو خليتوا
فى ضرعى لبن ولا فى
جيبى فلوس !
انا شرعى من مئات
السنين قبلكم
وانا مصرى حر من الاف
السنين انا دمكم
انا مش ههاجر ولا هرضى
بالمذله
انا هعيش كريم فى ثرى
الوادى
أو اموت كريم وانا
واقف
واندفن مع عظام اجدادى
انا دينى مصرى وموحد
قبل الاف السنين
انا بشرتى، قمحى ، من
قمح مصر وشمسها .
انا شعبها ،وانا اهلها
، وانا اصلها
انا صورتى فى أحمد وفى
محمود وفى عبد الودود
وانت لو تتحرر يا
اخويا من القيود
هتقول انا حلمى وانا
حنا وانا مسعود .
تعالى معاى قوم وأفتح لمخك
تعالى قوم ومتخليش
شيطان يغشك
وميكونش بينا ظالم ولا مظلوم .
تعالى نبنى ونعمر
والمحبة تدوم .
نقضى على الجهل والفقر
وما يكونش فينا واحد محروم
نقضى على المرض والكره
والفرقه فى كام يوم
اوعى تفكر انك لو ظلمت
غيرك حتكون سعيد
ولا عن حكم الله
العادل هتكون بعيد .
دا اللى يفرق بين
الناس على معتقد
يبقى ما عنده دين ولا
احساس .
ومصر عاوزه اللى يجمع
بين الناس
واللقمة تكفينا والميه
تروينا
وسماء بلادنا غطاء
لينا .
وحتى الغريب لما يجى
يلاقى
المحبة والترحاب
وسطينا
نبنى سو مصر الكرامة والسلام
ونكون كدا قبله محبه
مش خصام
ونعيش فيها سوا بأمن
وسلام .
ليست هناك تعليقات:
إرسال تعليق