فلاح قبطى
أصيل
للأب القمص
أفرايم الانبا بيشوى
بقوله أزيك يا عم سعيد؟
قالى : انا بالله مبسوط والحال عال
كنت مريض وكنت مبخافش الموت
لانى لا عندى صحة ولا حتى القوت!
صرخت لربى وقلت الصحة والمال
ادانى الصحه وهبطوا على قرشين فى الحال
بقيت اخاف الاتنين . من الفقر القاسى
ومن الموت المفاجي!
خفت من البَطر والكفر يا ابويا
قلتله خد منى الصحة والمال
وادينى الستره وراحة البال
عشان انا ببقى على قمة العالم
لما بكون مش خايف أونادم
هو فيه حد من الجوع بيموت
دا الناس بتموت من التخمه
والكفن يا بونا ملهوش جيوب
مش هناخد معانا ولا حاجه
بس الحسنه اللى بنعملها
ومحبة لربنا بنقدمها
ورحة البال مش بالمال
انا قلت لربنا انا مش عايز حاجه
حتى لو خد منى كل الاشياء
انا مش عايز وياه حاجه
حتى لو جابلى كل الامراض
انا بربى سعيد شبعان
يكفى محبة الله والناس ليا
وقت الشده تمتلى تبان
ربنا مخدش وادانى كمان معرفته
وبقت مش فارقه معايا
أموت ولا أحيا وانا وياه
انا أصلى يوم وراء يوم بلقاه
يذود فرحتى بيه، رغم الظلم اللى انا
بلقيه
من عبد الموجود جارى، أصله حرامى
يسرقى برسيمى لبهايمه وفولى لحراتى
وانا أعمل نفسى مش شايفه وأطاطى
والاسطى حنفى الغشاش حتى الميه بيسرقها
وانا بروى الارض يهربها لغيرى ويرويله
مهو كل واحد ليه فى الدنيا والاخره
نصيبه
يبقى انا لازم استر واسيبه!
ورغم التعب اللى فى رجليه
ورغم انى محدش حاسس بيه
حتى الاولاد سافروا وسابونى
بس انا بحمد ربى كل صبح وكل عشية
تعرفى ليه يابونا انا جيتلك ؟
قلت ازاى من غير متقولى
اعرف طلبك ياعم سعيد ؟
قلى العدراء جاتنى امبارح
قالت روح لابونا وقاله أنك سارح
بعد يومين للأرض الحلوه
مش محتاجه هناك حرات ولا مروه
هتكون فيها ويا حبيبك
وجيت اطلب منك تصليلى
وتناولى وتوصي عليه
رب المجد يقبل توبتى !
قلتله اذكرنى يا سعيد
وانت هناك بامانه تقله
على تعب العالم وكمان ذله
وتقوله على أحوال مصر التعبانه
يمكن ياعم سعيد يسمع منك ويصلحها
قالى حاضر يا ابونا انا هروحله واحكيله
وتراب بلدى فى كفنى أشيله .
بعد يومين عم سعيد جابوه محمول
شفته والبسمه علياه جبينه
مات بس شكله ملاك شيلينه
قلت السماء مفتوحه على طول
طوبى للمساكين بالروح
أحزنهم فى السماء بتروح .
أحزانهم فى السماء بتروح.
ليست هناك تعليقات:
إرسال تعليق