للقمص أفرايم الأنبا بيشوى
(1)
"الحكيم يفهم"
فيه ناس تشوفها بتضحك
وداخلها مليان أحزان والآم
وناس يبان عليها السكوت
لكن داخلها صخب وزحام
وناس تلاقيها تبان هاديه
لكن جواها ضجيج وأوهام
واللي يعيش يلاقي ويشوف
والحكيم يفهم ويقدر الناس
ويكون كله ذوق وأحساس
....
(2)
"ناس وناس"
فيه ناس تعيش الشهر بسنة
وفيه ناس سنينها كأنها أيام
فيه ناس تجول تصنع الخير
والبعض بس طق حنك وكلام
ناس تكون حب ونور وصلاة
وناس خفافيش تعيش في ظلام
الشاطر ساهر لخلاص نفسه
والجاهل فى أيام الزراعة ينام
ما نصنعه خير أو شر فى السر
لربنا معروف وها تعلنه الأيام
....
(3)
"يقودك الي التمام"
اللي يعيش ياما يشوف وتفرجه الأيام
واللي يقرأ التاريخ يشوف حكم والهام
واللي يغوص في النفوس يلاقى جواهر
ويشوف كما ناس حياتها صلاح وسلام
اللي يجاهد ينال ويبقى من ذوى الأفهام
وصانع الخير ببال مرتاح في هدوء ينام
اللي يصنع الشر مايلقيش هدوء ووئام؟
صلي لربنا ينجيك ويقودك علي الدوام
.....
(4)
" أثمر طول الأيام"
أرمي همومك علي اللي ما بينام
وقله دبر حياتى وأنا أكون ليك خدام
أنا مستحقش أبوتك أو بحضنك أنام
دا حكمتك الغنية بترفع قليل الأفهام
وتدي حكمة للجاهل وتمنحه الألهام
نفسي يارب يكون كلامك هو حياتى
لهجي في نومى وجلوسي والقيام
ينجح طريقي ومعاه أثمر طول الأيام
........
(5)
" الناس معادن"
فيه ناس تحب غيرها وتقدم لها الأخلاص
وناس أنانية مصالحها على حساب الناس
وناس الشر يخليها تمزج المر فى الكأس
الناس معادن، دهب وفضه وخشب وقش
ومن أجود المعادن وأرخصها تلاقي ناس
خليك أنت الأصيل ومن روح الله فيك أنفاس
أختار صحابك وأبني علي الصخرة كأساس
يسند الصديق فى الضعف وتنمو ولا تنداس
وكن كريم مع صاحبك، يخليك مرفوع الرأس
ليست هناك تعليقات:
إرسال تعليق